المانيوال والأوتوماتيك وإستيبترونيك وإيزي ترونيك

الفتيس المانيوال Manual

الفتيس ده بيتكون من شوية نقلات أو غيارات 1, 2, 3, 4, 5, R
وفيه عربيات الفتيس فيها بيبقي أربع غيارات مش 5 زي اللي فوق 1, 2, 3, 4, R ووظيفة كل واحدة كالآتي :-
1 أو الغيار الأول وده بيبقي للطلعة بس يعني يا دوب نطلع بالعربية وننقل علي النقلة اللي بعدها اللي هي 2 أو الغيار التاني ..
2 أو الغيار التاني ودي النقلة اللي بننقل ليها بعد الطلعة الأولانية وبتستمر معانا لحد سرعة 40 كيلومتر تقريباّ أو 50 كيلومتر ..
3 أو الغيار التالت ودي تالت نقلة في الفتيس وهنا لما تكون عايز تزيد عن سرعة الـ 40 كيلومتر وتوصل لحد 60­ كيلومتر أو 70 كيلومتر ..
4 أو الغيار الرابع والغيار ده أحيانا بيكون اّخر غيار في الفتيس وأحيانا بيكون هو الغيار قبل الأخير أو قبل الغيار الخامس يعني والغيار ده بتستخدمه لما سرعتك بتزيد عن سرعة 70 كيلومتر وتبتدي تدخل بقي في 100 كيلومتر فما فوق ..
5 أو الغيار الخامس فـ ده زي ما قولنا في عربيات وعربيات بس عامةّ الأغلب بيبقي فيه خامس حتي الألتو الـ 800 سي سي دخلها خامس والغيار ده بنستخدمه لما نحب نزود السرعة بعد الـ 130 والغيار ده بيريح الموتور جداّ أما ال R ده طبعآ المارشدير يعني الجوع للخلف.
­======================
الفتيس الاوتوماتيك Automatic

بالنسبة للفتيس الأوتوماتك فيه أربع حارات أساسية وهي D ,N ,R ,P ووظيفة كل واحدة كالاّتي :-
وضع الـ P وده بنستخدمه في تثبيت العربية في مكانها وده لما تسيب العربية مركونة في أي مكان وهو نفس الغرض لما نيجي نعشق العربية المانيوال عند أي غيار لما نركنها عشان متتحركش ولكن الوضع P مش بيعشق الفتيس بالموتور وبالتالي نقدر ندور الموتور ع الوضع ده ..
وضع الـ R والوضع ده عشان نرجع بالعربية مارشدير ..
وضع الـ N وده وضع محايد يعني زي لما نمور العربية في المانيوال ونقدر برضو ندور الموتور في الوضع ده ..
وضع الـ D والوضع ده عشان نطلع بالعربية ولما بنسخدم الـ Dالفتيس بينقل مع نفسه وأنت كل اللي عليك إنك هتزود بنزين أو تدوس فرامل ..
­======================

إستيب ترونيك Tiptronic

هو فتيس أتوماتيك وفيه الإمكانيه إنك تقدر تحوله لمانيوال يعني فيه D ,N ,R ,P وفيه كل حاجة زي اللي أتكلمنا عليها بس جنب الـ D هتلاقي فيه علامتين هم ( + ) و ( ­- ) وهو ده الجزء المانيوال اللي فيه واللي بدوره لما تجيبه علي الجزء بتاع + هتقدر تستخدمه بإن أنت تتحكم أمتي تعلي الغيار عن طريق لمس الفتيس في الإتجاه ( + ) أو أمتي تقلل الغيار عن طريق لمسه في الإتجاه ( ­- )
وعشان كدة بيسموه touch Manual لأن أنت بتنقل عن طريق لمسة في أي إتجاه من الإتجاهين
وتعتبر عيوب الفتيس إستيبترونك إنه بيكلف الموتور بنزين عالي وتكلفة صيانته تكاد تكون ناااااااار
ولكن مميزاته برضوإنه بيدى عزم وسحب أقوى من الأوتوماتيك لأن المانيوال بطبعه أقوى من الأوتوماتيك وده اللى بيخلى عربية زى الفيكترا (إيزى ترونيك) تتفوق على الجيتا والأوكتافيا (إستيبترونيك) فى السحب مع إنهم نفس الحجم والوزن وقوة الموتور ..

­======================

­إيزى ترونيك Easytronic

هو نموذج للفتيس اليدوي ولكن بصبغة تلقائية بحيث يتواجد فيه خيارات “D +” أو “D -”، بالإضافة إلى “P”و”N” و”R”، بحيث إن أنت كسائق مش هتحرك العصاية زي أي فتيس من اللي فوق عشان تدخل التورس في المجري المخصص لكل سرعة والإيزي ترونك بيحتوي علي 3 حارات ( – ), ( + ), R ,N
وضع الـ N وده لما تيجي تدور العربية زي ما تقول كدة ممورها
وضع الـ R وده عشان ترجع ورا كالمعتاد
( + ) إنك تزود الغيار
( – ) إنك تقلل الغيار